Jinnaat / Shayateen

Posted By: Subhani Nadeem. Shaytaan: Shaytaan arabi mein har sarkash, na-farmaan aur mutakabbir ko kehte hai

Insaano ke liye shaytaan lafz ka istemaal:  Shaytaan ke maani na-farmaan aur mutakabbir bhi hai, is lehaaz se insaano ke liye bhi shaytaan lafz istemaal kiya ja sakta hai jaisa ke Qur’an ki ayaath is baath ki daleel hai 1. sureh baqara ayath 14: aur jab wo (munafiqeen) imaan waalo se milte hai to kehte hai ke hum bhi imaan laaye aur jab apne shayateen (yaani buzrugo aur sarkash sardaaro) ke paas jaate hai to kehte hai ke hum to tumhare saath hai 2. sureh an’aam ayath 112: aur hum ne to isi tarah shaytaan insaano aur shaytaan jino ko nabi ka dushman banaya hai jo ek dosre par khush ayinda baate, dhuke aur fareb ke taur par alqa karte rehte hai In ayaath se ye baath waazeh hoti hai ke insaano ke liye bhi shaytaan ka lafz istemaal kiya ja sakta hai lekin is etebaar se ke wo mutakabbir aur na-farmaan hai

Jinnaath mein momin bhi hai aur shaytaan bhi: Sureh jinn ayath 14-15: haan hum mein (jinnaath) baaz to musalmaan hai aur baaz be-insaaf hai. Jo farmabardaar ho gaye unhone to raahe raasth ka qasd kiya aur jo zaalim hai wo Jahannam ka indhan ban gaye. Yaani jinnaath mein nek bhi hai aur shaytaan bhi (yaani na-farmaan) Tamaam jin shaytaan nahi hai balke jin mein ek gruh nek bhi hai aur ek gruh shaytaan hai

Nek jin jannath mein aur shaytaan jin Jahannam mein: Sureh araaf ayath 179: aur yaqinan hum ne jino aur insaano mein se bahuth zyada tedaad ko Jahannam ke liye paida kiya hai

Jinnaath ki taqleeq: Sureh Rahman ayath 15: aur jinaath aur aag ke shulo se paida kiya gaya hai

Iblees: Jinnaath mein sab se bada shaytaan iblees hai jis ne sab se pehle Allah ta’ala kin a-farmaani ki aur kaafir ban gaya Sureh baqara ayath 34: aur wo kaafiro mein se ho gaya. Ulema kehte hai ke iblees ko ye naam isi liye diya gaya kyo ke wo Allah ki rehmath se mehroom ho gaya tha. Iblees ke maani hai ‘intehaayi mayoos’ aur ye osi jin ka naam hai jis ne Adam (as) ko sajda na kiya aur Allah kin na-farmaani ki. Ulema ekraam kehte hai ke iblees ka naam pehle azaazeel tha. Iblees jin hee hai jis ke baare mein Allah ta’ala ne sureh kahaf ayath 50 mein farmaya (iblees) jino mein se tha aur us ne apne rab ke hukm kin a-farmaani ki. Iblees ko ibaadath wa riyazath ki wajeh se farishto ke saath rehne laga tha lekin wo farishta nahi tha

Iblees aur dosre shayateen: Iblees aur dosre shayteen sab ke sab jin hee hai lekin na-farmaani aur sarkashi ke etebaar se farq hai, is liye ke iblees sarkashi mein tamaam shaytaano se bad kar hai aur yaha tak ke gumraahi phailaane mein wahi un ka sardaar hai, aur phi rose qayamath tak muhullath di gayi hai aur wo qayamath tak logo ko gumrah karta rahega jab ke dosre shayateen ko na qayamath tak ke liye muhullath di gayi hai aur na hee ye zaruri hai ke wo hamesha gumraah rahe, kyo ki wo Islaam qubool kar sakte hai aur mumin jinnaath mein shamil ho kar jannath mein bhi dakhil ho sakte hai

Ham-zada: (har insaan ke saath waala jin (shaytaan): Ham-zada se muraad shaytaan hai jo har insaan ke saath hamesha rehta hai au rose gumrah karne ki koshish karta hai. Ye shaytaan iblees nahi hota lekin ye osi ka hee ek chela jaisa hota hai, iblees ki rehayesh to paani par hai. Agar insaan Allah ke zikr aur taqwe ka daaman thaame rahe to ye ose kuch nahi kar sakta (InshaAllah), lekin agar insaan zikr ilaahi se ghaflat karta hai to wo insaan ko behkata hai. Sureh zukhruf ayath 36: jo shaqs Rahmaan ki yaad se ghaflat kare, hum us par ek shaytaan muqarrar kar dete hai, wahi us ka saathi rehta hai Hadith muslim 2815: Hz. Aisha (ra) ka bayaan hai ke Nabi(saw)  raath ke waqt un ke paas se nikle to unhe gheerat aa gayi (yaani wo samjhe ke Aap  kisi aur biwi ke paas tashreef le gaye) phir Aap  waapas laute aur mera haal dekha to farmaye aye Aisha (ra) tujhe kya hoa? Kya tujhe gheerat aa gayi? Main ne kaha bhala aisa kyo na ho ke mere jaisi aurath Aap jaise shuhar par gheerat na kare. Aap  ne farmaya kya tere paas tera shaytaan aa gaya hai? Main ne pucha aye Allah ke Rasool  kya mere saath shaytaan hai? Aap  ne farmaya haan! Phir main ne pucha kya Aap  ke saath bhi hai? Tab Aap  ne farmaya haan (mere saath bhi hai) lekin mere rab ne us ke muqable mein meri madad ki hai aur main us se salaamath hoon

Shaytaan ki farewell speech: Qayamath ke din shaytaab Jahannam mein aag ke member par baith kar khitaab karega jise tamaam log sunenge Sureh ibraheem ayath 22: jab maamle ka faisla kar diya jaega (yaani jannati jannath mein aur jahannami Jahannam mein) to shaytaan (jahannamiyo) se kahega ke Allah ne to tumhe (paighambaro ke zariye najaath ka) saccha waada diya tha aur main ne tum se (bila daleel wa hujjath) jo wade kiye thein un ki khilaaf warzi ki (main ne to tumhe jhoti ummide hee dilayi thi jo na kabi haasil hoi aur na hee haasil hongi) mera tum par koi dabao to tha hee nahi, haan main ne tumhe pukara aur tum ne meri maan li, pas tum mujhe ilzaam na lagao, balke khud apne aap ko malaamath karo, na main tumhara faryaad ras hoon aur na tum meri faryaad ko pahonchne waale ho, main to sare se manta hee nahi ke tum mujhe is se pehle Allah ka shareek maante rahe, yaqinan zalimo ke liye dardnaak azaab hai. Is tarah shaytaan apni haqiqath insaano ke saamne khol dega aur phir us ke chele chaahe wo insaano mein se ho ya jinnaath mein se un ko bhi dhoka de dega.

Jinnaath ka khana: 1. Hadith muslim 450: jino ne Nabi  se apni khuraak (khana) ke baare mein pucha to Aap  ne farmaya tumhari khuraak har wo haddi hai jis par Allah ka naam liya gaya ho, aur wo tumhare haath mein aate hee gosht se bharpur ho jaegi aur tumhare janwaro ka chara mengniya hai. Phir Aap  ne (Sahaba(ra) se farmaya ke tum in duno ashya ke saath istenja math karo kyo ke ye tumhaare (musalmaan jin) bhaiyyo ki khuraak hai 2. zameen par giri padi cheez bhi shaytaan ki khuraak hai: hadith muslim 2034: Nabi  ka farmaan hai ke jab tum mein se kisi ka koi luqma zameen par gir jaaye to ose saaf kar ke kha le au rose shaytaan ke liye na chohde

Bismillah na padi jaaye to shayateen khaane mein shareek hote hai: Hadith muslim 2018: Nabi (saw) ko Hz. Jabir (ra) ne farmaate hoye suna ke jab aadmi apne ghar mein dakhil hota hai aur dakhil hote waqt Allah ka zikr karta hai (yaani bismillah padta hai) aur khaane ke waqt bhi Allah ka zikr karta hai to shaytaan (apne sathiyo se) kehta hai, na to (yaha) tumhaare liye raath ka qayaam hai aur na hee raath ka khaana. Lekin jab insaan ghar mein dakhil hote waqt Allah ka naam nahi leta to shaytaan kehta hai tum ne (yaha) raath ka qayaam pa liya aur jab insaan khaane ke waqt Allah ka naam nahi leta to shaytaan kehta hai tum ne raath ka qayaam aur raath ka khaana pa liya.

Shaytaan baaye haath se khaate hai: Hadith tirmizi 1799: Nabi (saw) ne farmaya tum mein se koi bhi apne baaye haath se math khaaye piye kyo ke shaytaan apne baaye haath se khaata pita hai

Shayateen bil umoom gandi aur viraan jagho par rehte hai: Hadith musnad ahmad 369/4: Nabi (saw) ne farmaya bila shuba in qazaaye haajath ke muqamaat par jinnaath maujud hote hai, lehaza jab tum main se koi baitul qala mein aane ka irada kare to yo kahe main khabees jino aur khabees chudelo se Allah ki panaah pakadta hoon

Baaz shayateen gharo mein rehte hai: Hadith muslim 2236: ek nau jawaan ne apne ghar mein saanp ko mara jo asal mein jin tha, phir saanp ne bhi us nau jawaan par hamla kiya to wo mar gaya aur saanp bhi mar gaya. Jab Nabi (saw) ko is waaqe ki qabar mili to Aap(saw) ne farmaya ke bila shuba madine mein jinnaath ka ek gruh Islam qubol kar chuka hai, pas job hi un gharo mein rehne waale jino mein se kisi ko paaye to ose 3 din tak  (ghar chohd kar chale jaane) ki ittela de, agar wo baadh mein bhi ose nazar aaye to ose qatal kar de kyo ke wo shaytaan hai

Shaytaan insaan ke jism mein qoon ki tarah daudta hai:  Hadith bukhari 2038: Nabi  ne farmaya ke bila shuba shaytaan insaan mein qoon ki tarah daudta hai (yaani bahuth zyada behkata hai ya ye muraad bhi hai ke Allah ta’ala ne shaytaan ko itni taaqath de rakhi hai ke wo insaan ke jism mein qoon ki tarah daud sakta hai

Dhoop aur saaye ke darmiyaan shaytaan ke baithne ki jagah hai: Hadith musnad ahmad 413/3: Nabi  ne dhoop aur chao ke darmiyaan baithne se mana farmaya hai aur farmaya hai ke ye shaytaan ke baithne ki jagah hai

Shaytaan akbar iblees ka thikana paani par hai: Hadith muslim 2813: Nabi (saw) ne farmaya iblees apna arsh paani par rekhta hai phir waha se apne lashkaro ko bhejta hai (ta ke wo logo ko gumrah kare) us ke lashkar mein se us ke sab se zyada qareeb wo hota hai jo sab se bada fitna barpa karta hai. Chuna che us ke lashkar mein ek shaytaab aa kar kehta hai ke main ne fala fala burayi karvayi, iblees kehta hai nahi tu ne kuch nahi kiya, phir dosra ata hai aur kehta hai ke ose main ne us waqt tak nahi chohda hatta ke us kea ur us ki biwi ke darmiyaan judaayi daal di. Iblees ose kehta hai tum ne waaqeyi bada kaam kiya hai aur ose apne qareeb kar leta hai

Shayateen ko sing hoti hai aur kaan aankh aur naak: 1. Sureh araaf ayath 179: aur hum ne bahuth se jin aur insaan Jahannam ke liye paida kiye hai, jin ke dil aise hai jin se wo nahi samajhte, aur jin ki aankhe aisi hai jin se wo nahi dekhte, aur jin ke kaan aise hai jin se wo nahi sunte 2. hadith bukhari 3282: phir suraj ghuroob hone tak salaah se ruke raho kyo ke suraj shaytaan ke 2 singo ke darmiyaan ghuroob hota hai

Shayateen bulandiyo mein udte hai: Sureh jin ayath 9 : (jinnaath kehte hai) aur hum ne asmaan ko tatool kar dekha to ose saqt chaukidaro aur shulo se pur paya, us se pehle hum baatein sunne ke liye asmaan mein jagah jagah baith jaya karte thein, ab jo bhi kaan lagata hai woe k shole ko apni taak mein pata hai

Shayateen ko shakal badalne ki taaqath ata ki gayi hai: Sureh anfaal ayath 47-48: un logo jaise na banu jo itraate hoye aur logo mein khud numayi karte hoye apne gharo se chale aur Allah ki raah se rukte thein. Jo kuch wo kar rahe hai Allah ose gherne wala hai jab ke un ke amaal, shaytaan unhe zinath daar dikha raha tha aur keh raha tha ke logo mein se koi bhi aaj tum par ghaalib nahi aa sakta. Main khud bhi tumhara himayati hoon, lekin jab duno jamaate namudaar hoyi to apni ediyo ke bal piche har gaya aur kehne laga ke main to tum se bari hoon. Main wo dekh raha hoon jo tum nahi dekh rahe. Main Allah se darta hoon aur Allah saqt azaab wala hai Junge badr mein shaytaab suraqa bin maalik ki surath mein mushrikeen ki madad ko aya. Lekin jab farishto ko dekha to ediyo ke bal bhaag gaya. Hadith bukhari 5010: Nabi  ne Hz. Abubakr (ra) ko sadqe ke khujuro ki nigraani ke liye muqarrar farmaya, to shaytaan ek admi ki shakal mein aya aur chori ki koshih ki magar Hz. Abu Huraira (ra) ne ose pakad liya, phir us ne guzarish ki to chohd diya Hadith muslim 2236: shayateen sanpo ki surath bhi eqtiyaar kar sakte hai

Shayateen raath ke waqt phailte hai: Hadith bukhari 3304: Nabi  ka farmaan hai ke jab shaam hoti hai aur raath ka aghaaz hota hai, us waqt shaytaan phail jaate hai, lehaza us waqt apne baccho ko gharo mein rok lena chahiye aur Bismillah pad kar gharo ke darwaaze bandh kar lene chahiye kyo ke shaytaan bandh darwaaza nahi khol sakte

Shayateen ko baaz jaanwar dekh sakte hai:  Hadith bukhari 3303: Nabi  ka farmaan hai ke murghe ki azaan suno to Allah se us ka fazal ka sawaal karo kyo ke us ne farishte ko dekha hai aur jab tum gadhe ki awaaz duno to shaytaan se Allah ki panaah mango kyo ke wo shaytaan ko dekhta hai

Shaytateen ki hadh muqarrar hai: Sureh Rahman ayath 33-35: aye insaano aur jinaath ke gruh agar tum mein asmaano aur zameen ke kinaaro se baaher nikal jaane ki taaqath hai to nikal bhaago, baghayr ghalba aur taaqath ke tum nahi nikal sakte, phir apne rab ki kis kis nemath ko jhutlaoge? Tum par aag ke shole aur dhua chohda jayenge phir tum muqabla na kar sakoge

Shaytaan Nabi(saw)  ki surath eqtiyaar nahi kar sakte: Hadith muslim 2266: Nabi  ne farmaya jis ne qwaab mein mujhe dekha us ne mujhe hee dekha kyo ke shaytaan meri surath eqtiyaar nahi kar sakta

Shayateen bandh chize nahi kholte: Hadith muslim 2012: bartan dhaank do, mashk ka mu bandh kardo, darwaaza bandh karlo, chiraagh bujha do kyo ke shaytaan na to (bandh)mashk ka mu khol sakta hai, na (bandh) darwaza khol sakta hai aur na hee (bandh)bartan khol sakta hai

Shayateen ko mauth aati hai: Sureh Rahman ayath 26-27: jo bhi zameen par hai sab fana hone waale hai, sirf azmath wa izzath waali tere rab ki zaath hee baaqi rahegi Hadith bukhari 7383: Nabi  ki ek dua ke alfaaz ye hai ke aye Allah main teri izzath ke saath teri panah maangta hoon, tere siva koi maboodh nahi jise mauth nahi aati, jab ke jino aur insaano ko mauth aati hai (iblees ko qayamath tak ki mahulath di gayi hai, qayamath se pehle ose mauth nahi)

Shaytaan takleef dene ke tariqe: 1. chote bacche ko takleef dena: Hadith bukhari 3431: Nabi  ne farmaya Maryam (as ) aur un ke bete (Isa (as) ke alawa har paida hone wale bacche ko shaytaan chuta hai aur shaytan ke chune ki wajeh se wo chiqta hai 2. bure qaab dikhana: Hadith bukhari 6976: Nabi  ne farmaya accha qwaab Allah ki taraf se hai aur pareshaan kun qwaab shyataan ki taraf se hota hai 3. kuch chura lena: Nabi  ne Hz. Abu Huraira (ra) ko sadqa fitr ki hifazath ke liye muqarrar farmaya tha. Shaytaan waha se rozana anaaj churaane ki koshish karta magar Abu Huraira (ra) ose pakad lete 4. mauth ke waqt khatbi banana: Hadith nasayi 5531: Nabi  ye dua maanga karte thein aye Allah main teri panah pakadta hoon gir kar halaak hone se, imaarath mein dab jaane se, dobne se, jal jaane se aur mauth ke waqt shaytaan ke khatbi bana dene se (yaani mauth ke waqt behkaane se)

Shaytaani waswase: Waswase ke maani hai makhfi awaaz, shaytaan ko itni taaqath di gayi hai ke wo ghayr mehsoos tariqe se insaan ke dil bure was wase daal sakta hai. Dil mein uthne waale har waswase shaytaan ki taraf se nahi hote, us ke alawa insaan ki apni nafs bhi ose bure waswase daalti hai Sureh qaaf ayath 16: aur hum us ke apne nafs se ubharne waale was wasu ko jaante hai

Waswasu se bachne ke tariqe: a. salaah mein waswase aaye to auzubillahi minash shaytaan nir rajeem keh kar baayi jaanib 3 baar halka sa thok dena chahiye Hadith muslim 5738: Hz. Osman bin Abul Aas (ra) ke is shikaayath par ke unhe salaah mein shaytaani was wase aate hai, Nabi (saw) ne famaya ke wo shaytaan hai jise khanzab kaha jaata hai, jab tum ose mehsoos karo to us se Allah ta’ala ki panaah mango (yani Auzu billah) kaho aur apni baayi jaanib halka 3 martaba thuko, hz. Osman (ra) kehte hai ke Auzubillah kehna chahiye aur baayi jaanib halka sa 3 martaba thook dena chahiye. Hz. Osman (ra) kehte hai ke main ne aisa kiya to Allah ta’ala ose mujh se le gaye b. sureh naas ki tilaawath c. hadith tirmizi 2988: Nabi  ne farmaya shaytaan Asam ke bet eke dil mein qayaal daalta hai aur farishta bhi. Shaytaan yo qayaal daalta hai ke insaan ke dil mein burayi aur haq ki takzeeb paida karta hai aur farishta yo qayaal daalta hai ke insaan ke dil mein acchayi aur haq ki tasdeeq paida karta hai, (lehaza jise ye farishte waale maamle ka) ehsaas ho to wo jaan le ke ye Allah Ta’ala ki taraf se hai aur wo Allah ki tareef kare (SubhanAllah) aur jise (shaytaan waale maamle ka) ehsaas ho to wo shaytaan se Allah ta’ala ki panah talab kare. phir Nabi  ne ye ayath tilawath farmayi Shaytaan tum ko faqr ka wada deta hai aur tumhe be-hayayi par aamada karta hai